04 Aug
خطوات مهمه لتحضير البشرة الدهنيه قبل وضع الميكب
خطوات مهمه لتحضير البشرة الدهنيه قبل وضع الميكب
أصحاب البشرة الدهنيه بيعانو كتير أثناء وضع الميكب، ودة بسبب الإفراز الزايد لزيوت البشرة الطبيعيه واللى بتأثر على ثبات الميكب بتاعك ولمعانه. لكن فى حاله تحضير البشرة قبل وضع الميكب، فده بيضمنلك ميكب ثابت وجذاب أكتر. عشان كدة هنقدملك أهم خطوات لتحضير البشرة الدهنيه قبل وضع الميكب.
فى البداية، لازم تكونى متأكده من نوع بشرتك، لان تطبيقك لأى روتين تحضيرى للبشرة الخطأ هيعرض بشرتك لمشاكل كتير، طب ازاى أعرف نوع بشرتى؟؟؟
إختبار بسيط جدا هتقدرى من خلاله تعرفي اذا بشرتك فعلا دهنيه او لأ : – قبل النوم اغسلى وشك بمنظف ونشفيه كويس، وماتحطيش بعدها أى كريم. – بمجرد ماتصحى من نومك، هاتى مجموعه من الورق الشفاف وحطيه على منطقه الجبهه، الخدين، عظام الفك، الدقن. – لو لقيتى كل الورق الشفاف فيه كميه كبيرة من الزيوت فبشرتك هتكون دهنيه، لكن لو لقيتى بعض الأوراق عليها كميه كبيرة من الزيوت والبعض الاخر كميه أقل فكده بشرتك هتكون مختلطه، ولو لقيتى على كل الأوراق كميات معتدله ومتساويه من الزيوت فبشرتك بكده هتكون عاديه، أما لو لقيتى مفيش تقريبا اى زيوت على الاوراق بكده بشرتك هتكون من النوع الجاف.
طيب ازاى أقدر أحضر بشرتى الدهنيه قبل الميكب؟؟
بعد مااتأكدتى ان نوع بشرتك دهنى، هنقولك على روتين بسيط جدا، لو استخدمتيه يوميا هتحسي بفرق كبير ف بشرتك وكمان هيريحك أثناء وضع الميكب بتاعك:
1/ استخدمى منظف أو غسول مناسب لبشرتك: المنتجات اللى بتحتوى على حمض الساليسليك مناسبه جدا لأصحاب البشرة الدهنيه، لانه بيساعد على تقشير البشرة أثناء التنظيف بدون مايسبب جفاف للبشرة.
2/ ترطيب البشرة : استخدمى كريم مرطب خالى من الزيوت عشان يناسب طبيعه بشرتك.
3/ استخدمى ماء الورد : ماء الورد بيقلل من لمعان البشرة وكمان بيدى نضارة وحيويه أكتر لبشرتك، رشيه على البشرة واتركيه يجف بشكل طبيعي قبل الميكب.
4/ استخدمى البرايمر: البرايمر من المنتجات المهمه جدا لأصحاب البشرة الدهنيه، وده لأنه بيسيطر على إفراز البشرة للزيوت، وكمان بيكون قاعده ثابته للميكب بتاعك عشان تحافظى على ثباته لمده أطول.
0 Comments