خطوات مهمه لتحضير البشرة الدهنية قبل وضع الميكب
أصحاب البشرة الدهنية بيعانو كتير أثناء وضع الميكب، ودة بسبب الإفراز الزايد لزيوت البشرة الطبيعية واللي بتأثر على ثبات الميكب بتاعك ولمعانه.
لكن فى حالة تحضير البشرة الدهنية قبل وضع الميكب، فده بيضمنلك ميكب ثابت وجذاب أكتر. عشان كدة هنقدملك أهم الخطوات لتحضير البشرة الدهنية قبل وضع الميكب.
فى البداية
لازم تكوني متأكدة من نوع بشرتك، لان تطبيقك لأى روتين تحضيري للبشرة الخطأ هيعرض بشرتك لمشاكل كتير.
طب ازاى أعرف اني من اصحاب البشرة الدهنية؟؟؟
إختبار بسيط جدا هتقدري من خلاله تعرفي اذا بشرتك فعلا دهنية او لأ :
* قبل النوم اغسلي وشك بمنظف ونشفيه كويس، وماتحطيش بعدها أى كريم.
* بمجرد ماتصحي من نومك، هاتي مجموعة من الورق الشفاف وحطيه على منطقة الجبهة، الخدين، عظام الفك،
الدقن.
_ لو لقيتي كل الورق الشفاف فيه كميه كبيرة من الزيوت فبشرتك هتكون “دهنية”،
لكن لو لقيتي بعض الأوراق عليها كمية كبيرة من الزيوت والبعض الآخر كمية أقل فكده هتكون “بشرتك مختلطه“.
_ ولو لقيتي على كل الأوراق كميات معتدلة ومتساوية من الزيوت بكده هتكون “بشرتك عادية“،
أما لو لقيتى مفيش تقريبا أى زيوت على الاوراق بكده هتكون “بشرتك جافه“.
طيب ازاي أقدر أحضر بشرتي الدهنية قبل الميكب؟؟
بعد مااتأكدتي ان نوع بشرتك دهني، هنقولك على روتين بسيط جدا، لو استخدمتيه يوميا هتحسي بفرق كبير ف بشرتك وكمان هيريحك أثناء وضع الميكب بتاعك:
استخدمى منظف أو غسول مناسب لبشرتك:
المنتجات اللى بتحتوى على حمض الساليسليك مناسبة جدا لأصحاب البشرة الدهنية، لانه بيساعد على تقشير البشرة أثناء التنظيف بدون مايسبب جفاف للبشرة.
ترطيب البشرة :
استخدمي كريم مرطب خالي من الزيوت عشان يناسب طبيعة بشرتك.
استخدمى ماء الورد :
ماء الورد بيقلل من لمعان البشرة وكمان بيدي نضارة وحيوية أكتر لبشرتك، رشيه على البشرة واتركيه يجف بشكل طبيعي قبل الميكب.
استخدمى البرايمر:
البرايمر من المنتجات المهمة جدا لأصحاب البشرة الدهنية، وده لأنه بيسيطر على إفراز البشرة للزيوت، وكمان بيكون قاعدة ثابتة للميكب بتاعك عشان تحافظي على ثباته لمدة أطول.
لو عايزه تعرفي أكتر عن أسرار البشرة والطرق الصحيحة للتعامل معاها تقدري تتابعينا على موقع ميكب ايجيبت اللي بيضم معلومات وتوصيات من أكبر عدد من الميكب ارتست في جميع محافظات مصر.
